SHILLONG: National People’s Party (NPP)-chi dilenggipa Meghalaya Democratic Alliance (MDA) baksa bakrimaoni ma·ekna manchiani bidingo United Democratic Party (UDP)-ni gisepo changsaba chanchirima dongkuja ine da·o dipet iani bidingo UDP MLA-rangde maming kobor dongkuja ine parakataha.
Lok Sabha election-o chu·sokgipa ong·jahani gimin mitam dilgiparangsa MDA-oni ma·ekna chanchianirang sokbaengnaba gnang ine janapatengon, “Da·o dipet iani bidingo UDP-ni MLA-rangde ma·sia dongkuja aro party-ni gitaba apsan chanchia dongkujani gimin ian chanchichipe agananisan ong·aiakon,” ine UDP-ni MLA saksa kobor ra·timgiparangna aganaha.
UDP MLA-ni parakatani gitade, iani bidingo ua songbadrangonikosan poraimanengkua aro iandake MDA-oni ma·ekna tik ka·bebea donggenchimode MLA-rang pilakan iani bidingo ma·sitokgenchim.
UDP-ni mitam dilgiparangsa dingtang dingtang a·selrangni gimin MDA baksa bakrimanio kusi ong·jaenga indiba da·o dipet NPP baksa bakrimaniko pe·na dabianide dongkuja ineba ia MLA aganaha.
Koborrangko man·soani gitade, Shillong parliamentary constituency-o UDP, brigipa biapkosa man·rikaiahani gimin mitam dilgiparang suk ong·jae, NPP aro MDA baksa bakrimaoni ma·ekna tik ka·ahachim.
NPP-chi dilenggipa MDA baksa bakrimahani a·selsa Lok Sabha election-o chu·sokgipa ong·jaha ineba UDP-ni mitam dilgiparang matnangtokaha.
Batanggimin bilsirangonin manderang MDA sorkarini kamrango kusi ong·tokjaengani a·selsa ia Lok Sabha election-o Voice of the People’s Party (VPP)-na namgni ong·skaaha ineba UDP-ni mitam dilgiparang aganaha.
