SHILLONG: Hill State People’s Democratic Party (HSPDP)-ni dilgiparang, United Democratic Party (UDP) baksa Regionak Democratic Alliance (RDA)-o bakrimaoni ma·ekna skaniko parakataha.
RDA-ara HSPDP aro UDP dolrangni nangrime rikgipa alliance ong·achim aro ia gadangonin uamang, dingtang dingtang election-rango common candidate aro seat-rangko sualgrikeba susarongengachim.
Indake ong·engon, adita salrangna skang ong·atanggipa Lok Sabha election-o RDA-ni common candidate, chu·sokjahani gimin HSPDP-ni dilgiparang RDA-oni ma·ekna nangniktokenga ine u·iataha.
Iani bidingo talataniko on·angengon, “Lok Sabha election-o RDA candidate-ni chu·sokgijanio dingtang dingtang a·selrang donga aro iani giminsa HSPDP, RDA-oni ma·ekna tik ka·enga,” ine UDP-ni working president aro a·dokni Cabinet Minister Paul Lyngdoh parakataha.
Lyngdoh-ni parakatani gitade, RDA-oni ma·ekna gita HSPDP, ku·rangchi uamangna u·iataha.
“HSPDP-ni dilgiparang da·o dipet ku·sikmangmangchisan chingna u·iatengkua aro chinga iani bidingo apsan tom·e tik ka·na nangenga,” ine ua aganaha.
HSPDP-ni RDA-oni ma·ekanichi UDP-na nangchakeanirang donggenma ine sing·anina aganchakaniko on·angengon, “Ia chang chinga chu·gimik vote-rangoni 5 percent-ba gapjahani gimin chinga dingtang dingtang ong·e kamko ka·on nambatgipa ong·gen. Haida chinga UDP-rara susagenchimode 5 percent-na batede vote-rangko man·aba gnangchim,” ine UDP-ni working president aganaha.
Lok Sabha election-o RDA candidate-ni amako man·anio dingtang dingtang a·selrang donga ine talataniko on·angengon, “Ia pilak a·selrangkon an·ching name nina nanggen. A·selrangoni mingsade chinga election-na chingni manderangko name tarisona man·jaha. RDA-ni candidate-koba chinga VPP-ni candidate, Khasi-Jaintia Hills gimik wenangani ja·mansa parakataha,” ine Lyngdoh aganaha.