AMPATI: Mikkarang waenganichi South West Garo Hills a·jani dingtang dingtang songrangoba chi banengani gimin South West Garo Hills a·jani Rerapara C&RD Block ning·o donggipa Goramara, Garobadha aro Modhupara songrango donggipa 266 nokdangrangna merong, ringani chi aro uandakgipa dingtang dingtanga cha·ani ringani bosturangko suale on·angaha.
Ia cha·ani ringani bosturangko Sukrobar pringo, chi bananichi neng·nikanirangko man·enggipa nokdangrangna suale on·angaha aro bostu suale on·aniko Rerapara C&RD Block-ni BDO aro Executive Magistrate Armand Ch Momin an·tangan nirokangaha.
Ia cha·ani ringani bosturangko 266 nokdangrangoni gimik sak 1,722-mangni gita manderang man·rikaha.
Batanggimin salrangonin mikkarang dontonggija waengani a·sel ia songrango chi bananirangko nikna man·engahachim.
Chi bananichi neng·nikanirangko man·enggipa manderangna dakchakna gita sorkari, ia cha·ani ringani bosturangko sualataha.
