SHILLONG: East Jaintia Hills Umpleng songo misilpilgipa mande so·otani a·selo police darangkoba rim·na gita man·kujaenga. Mija Sonibar pringo matsramgipa atte-gitchirangchi den·ani bang·en mata pari aro jakrango kaa gnang sak bri manderangni manggisirangko nikaha.
Mijal salo sakgnini manggisirangkosan ma·siaha, police aganaha.
Sak bri sianggiparangko so·otani a·selko sandianio Special Investigation Team (SIT) dakchakenga, Sonibar-o East Jaintia Hills police u·iataha.
Ua a·sel dal·begipa ong·ani gimin SIT-ko songaha aro raken sandianio Investigating Officer (IO)-ko dakchakgen, East Jaintia Hills Superintendent of Police, Giri Prasad aganaha.
“Mande so·otani ia mamlako da·o sandienga,” SP aganaha. Pilak formalities-rang matchotani ja·mano manggisirangko rate porikka ka·na Khliehriat Civil Hospital-ona watataha.
Manggisirangoni saksa Ravi Rai (23) Nepal-ni Ilam district-oni ong·a aro gnigipa manggisi East Jaintia Hills Pohshnong, Dkhiah East-ni bilsi 33 Nasar Kyndait minggipa ong·a.
Crime Scene Unit (CSU), forensic Crime scene unit, aro Magistrate, official-ni gita chanchianina mol·molako man·aha, SP u·iataha.
