KSU-ni membor-rang ILP check point-ko songtaia

SHILLONG: Adita salrangna skang, Khasi Students Union (KSU)-ni membor-rang, Ri Bhoi a·jao Inner Line Permit (ILP) check point-ko songe a·dokona re·ruraenggipa manderangko nirokangani ja·man Sombar saloba changsataie KSU-ni membor-rang, Mawlai aro Mawprem jolrango ILP check point-rangko songe, a·dokona re·ruraenggipa manderangko nirokangtaiaha.
KSU-ko dilenggipa manderangni parakatani gitade, ia biaprango ILP check point-rangko songe am·sandianirangko dakon, gipin biaprangoni sak 117 manderang, labour licence aro Election ID gri dingtang dingtang dokkanrango kamrangko ka·enga aro dingtang dingtang bading chiwalanirangko dake cha·enga ine ma·sina man·aha.
Ia manderangoni bang·batan Nepal, Bihar, Uttar Pradesh aro gipin a·dokrangoni ong·a ineba KSU-ni dilgiparang parakataha.
Meghalaya a·doko niam gri napsrukanirangko sorkari champengna kam ka·jaenga ine matnangenba re·anggipa Sonibar salosan, Khasi Students Union (KSU)-ni membor-rang, uamangni president Lambokstar Marngar aro general secretary Donald Thabah-ni dilanichi, Ri Bhoi a·jani Pahammawlein songo donggipa National Highway (NH-6) ramao ILP check gate-ko songenba, a·dokona re·ruraenggipa manderangni nirokangahachim.
Gipin biaprangoni niam gri Meghalaya a·dokona re·baenggipa manderangko nirok sandina gita KSU-ni membor-rang, ia biapo ILP check gate-ko kuliaha aro NH-6 rama gita re·ruraenggipa garirangni lekkarangko niangaha.
Ia ILP check gate-ko kuliani bidingo KSU-ni president aro general secretary talate on·angengon, Meghalaya a·doko ILP aro Meghalaya Residents Safety & Security Act (MRSSA)-ko a·dok aro ma·mong sorkarirang ra·gatna gisik nangjaengani gimin jegalaniko mesokna gitasa uamang kuliaha ine parakataha.
Mikkangchiba a·dok aro ma·mong sorkarirang ILP aro MRSSA-ko ra·gate on·na gisik nangangkujagenchimode apsan daken an·tangtang niamko jako ra·e iandakgipa check gate-rangko kuliangkugen ineba KSU-ni dilgiparang parakataha.