Ma·mongni scheme-rangko nirokna Tura-ni MP ku·rachaka

TURA: Garo Hills-ni manderangna chame on·atgipa ma·mong sorkarini scheme-rangko nirok sandina gita Tura-ni gital MP Saleng A Sangma ku·rachakaniko on·angaha.
Tura Lok Sabha constituency-o uni cheanina dingtangmancha Sombar salo, North Garo Hills a·jani Resubelpara-o jinma tom·bimonganiko ong·atanio Tura-ni gital MP Saleng A Sangma, jinmana aganprakangengon, A·chikrangna, salgro salaram jolna aro a·song gimiknan kamko ka·na gita ku·rachakaniko on·angenba, Garo Hills-ni manderangna chamatgipa ma·mong sorkarini scheme-rangko name nirokna gitaba ua ku·rachakaniko on·angaha.
“Na·simangni bakrimani aro dakchakanichi angna ia mongsongbegipa kamko ka·na daitoko on·ahani gimin anga iako indin ong·gramaina on·jawa aro A·chikrangna, salgro salaram jol gimikna aro a·song gimiknan kamko ka·na gita jotton ka·gen. Parliament-oba anga apsan daken kamko ka·na Isolni bimingo ku·rachakahani gimin anga maming dakeba an·tangni daitooni an·piljawa,” ine Sangma aganaha.
Ma·mong sorkarini scheme-rangko name chu·sokatchina ua an·tangan name nirok sandianirangko dakanggen ine ku·rachakaniko on·angengon, an·tangtangni biaprango kamrangko name ka·jaenga ong·ode una u·iatchina gita Tura-ni MP, Garo Hills-ni manderangko didiangaha.
“BPL-ni nokrangko rikanio, JJM scheme, PMGSY aro uandakgipa dingtang dingtang kamrango na·simangko saoba cha·bokna jotton ka·enga ong·ode chingni DISHA tom·aniko ong·atanio chingna parakebo. Chu·sokatgija donenggipa scheme mingantikon see donbo. Anga Isolni bimingo ku·rachakenga aro dakna nanga pilak kamrangkon anga dakgen,” ine Sangma aganaha.
Lok Sabha election-o una ka·donge uko chegipa ong·atahani giminba ua Garo Hills gimikni manderangkon mittelpilangaha.
Tura Lok Sabha constituency-na an·tangni bimingko INC-ni high command-na recommend ka·atahani gimin Tura-ni MP, Williamnagar-ni gitcham MLA Deborah C Marak aro party-ni gipin dilgiparangkoba mittelpilangaha.