TURA: South Garo Hills a·jani Baghmara Block ning·o kam ka·enggipa gram sevak-rang, biaptango dongkame kamrangko ka·na man·na gita uamangna on·gimin quarter-rango dongatchina A·chik Conscious Holistically Integrated Krima (ACHIK) Southern Zone, Baghmara Block-ni BDO-ko didiataha.
Iani bidingo Baghmara Block-ni BDO-na sedoatengon, gram sevak-rang an·tangtangna on·gipa quarter-rango donggija BDO office-osa dongskaengani a·sel manderang nangan somoirangoba uamangko grongna man·tokjaenga ine ACHIK Southern Zone parakataha.
An·tangtangna on·gimin quarter-rango gram sevak-rangko dongatchina Baghmara BDO-ko didiatengon, gram sevak-rang songni manderangna skie on·anirangko dakchina, songni bidingo see rakkianirangko dakchina, survey-rangko ka·atchina aro dingtang dingtang kamrangni data-rangko chimongan baksana songni manderangna pilak nanga dakchakanirangko on·china gitaba ACHIK Southern Zone dabiangaha.
Gram sevak-rangna rikgimin quarter-rangko taripile on·china aro ia quarter-rangko name rakkichina gitaba ACHIK, Baghmara BDO-ko didiataha.