SHILLONG: National People’s Party (NPP)-chi dilenggipa Meghalaya Democratic Alliance (MDA)-o bakrimaoni ma·ekna miksonganirang donga ine jangbingbanganirangko United Democratic Party (UDP)-ni dilgiparang jegalatenba, ia sorkarina dongimin chu·gimik bilsi bonga bon·kujaskal uamang MDA baksa bakrimangkuaigen ine parakataha.
Iani bidingo kobor ra·timgipa manderang baksa agangrikengon, MDA-oni ma·ekna miksonganirang donga ine songbadrango seaniko nike ua namen aiao inmanaha ine UDP-ni president Metbah Lyngdoh parakataha.
“Chinga MDA sorkarioni ma·ekna chanchirima dongja ine anga talataniko on·na nangnika. Term matchotkujaskal chinga MDA baksa ong·angkuaigen,” ine Lyngdoh aganaha.
MDA-o NPP aro BJP baksa bakrimahani a·sel adita salrangna skang ong·atanggipa Lok Sabha election-o UDP chu·sokgipa ong·jaha ine agananirangkoba ua raken jegalataha.
Bilsisani gisepo maini a·sel UDP, Shillong parliamentary constituency-o namen tang·onangaha uamang name ma·sina man·kujaenga ineba ua aganaha.
Manderangsa iani bidingo chong·mot a·selrangko aganna man·gen ine ua an·tangni MLA-rangko, an·tangtangni manderangona re·angpile agangrikechina didiataha ineba UDP-ni president aganaha.
2018 bilsioni 2023 bilsiona kingkingde Assembly-o UDP-ni MLA sakdoksan dongaiachim ine gisik ra·atpilaniko on·angengon, MDA 1.0 sorkarini somoio ka·gipa kamrangni a·selsa uamang 2023 bilsini Assembly election-o dam 12 seat-rangko chena man·aha ine Lyngdoh parakataha.
UDP-na on·gipa cabinet-ni seat damgniko MLA-rangni gisepo sualgrikgenma ine sing·anina aganchakaniko on·angskaengon, iani bidingo ua an·tangde mamingkoba aganna man·jawa ine Lyngdoh aganaha.
Indake ong·engon, HSPDP-ni dilgiparang, Regional Democratic Alliance (RDA)-oni ma·ekna miksonganirang donga ine Paul Lyngdoh aganahani gimin iani bidingo talataniko on·china UDP dabigen ineba UDP-ni president parakataha.
