SHILLONG: Re·anggipa April jao ong·atanggipa Lok Sabha election-o Meghalaya a·dokni Lok Sabha constituency damgnion chu·sokgipa ong·na man·jahaoba, da·o ong·atna sienggipa Gambegre Assembly constituency-ni by-election-ode National People’s Party (NPP) chegipa ong·gen ine NPP-ni dilgipa aro a·dokni Cabinet Minister Rakkam A Sangma, an·tangni ka·dongchakenganiko parakataha.
Skangode Meghalaya a·doko NPP-ni MLA sakgnisan dongaiachim indiba da·ode a·dok sorkariko dilengaha ineba ua NPP-ni bilakrorobana man·ahani gimin janapataha.
“Politics-ode dingtang dingtang election-rango basakoba chegipa ong·na aro basakobade chu·sokgija ong·na man·aia,” ine ua aganaha.
MP, MLA aro MDC election pilakan dingtanggrikani dongaia ineba ua aganaha.
Gambegre by-election-o nambatgipa candidate-ko susaate chegipa ong·na gita NPP, bilakbee kamrangko ka·soengachim ine nikna man·a.
Manderang NPP-ko seokgenchim ong·ode constituency-o dingtanganirangko nikna man·gen ineba Sangma aganaha.
Gambegre by-election-na BJP-ni chakpaanirangko ra·na nangjawa ine janapatengon, Lok Sabha election-oba NPP, BJP-ni chakpaanirangko am·jachim ine NPP-ni dilgipa a·kangataha.
Lok Sabha election-o a·dokni BJP dol, NPP-na chakpaanirangko on·skaahachim ine nikna man·a.
Lok Sabha election-na campaign ka·ani somoio badiaba dolrang, tol·pinapgipa video-rangko social media-rangko watahani a·selsa NPP amako man·aha ineba Sangma aganaha.
Gambegre by-election-o BJP dolba an·tangari susana tik ka·ahachim ine nikna man·a.
