TURA: Meghalaya a·dokni RMSA skulrango skigiparang, All Meghalaya RMSA Teachers Association (AMRMSATA)-ni bimingo dingtang dingtang dabianirangko a·dokni Education Minister Rakkam A Sangma-na on·ataha.
Skanggipao uamang, Secondary aro Higher Secondary gadangni skigiparangna komibeoba basic pay scale-na bimangko tarichina gita Education Minister-ko mol·molataha. Association-ni parakatani gitade, da·o dipet RMSA skigiparangna salary framework dongkujaenga.
RMSA skulrango non-teaching staff-na kamrangko nakatatchina gitaba AMRMSATA, a·dokni Education Minister-ko didiataha. Skulrango non-teaching staff-rangsa an·tangtangni kamrangko ka·anichi skulrangko name ka·na gita dakchakgiparang ong·a ine janapatengon, a·dokni pilak RMSA skulrangon non-teaching staff-na kamrangko nakatatchina gita skigiparang dabiangaha.
RMSA skigiparangko Meghalaya Medical Attendance Rules 1981-ni ning·o man·chapatchina gitaba AMRMSATA, a·dokni Education Minister-ko didiataha.
Da·o dipet RMSA skigiparang maming man·dapani gri jaantini dormahamangmangkosan man·kuenga ine janapatskaengon, skigiparangba saa ding·ani somoirango maming neng·nikanirangko man·jana gita RMSA skigiparangkoba ia niamni ning·o man·chapatchina a·dokni Education Minister-ko mol·molataha.
RMSA skigiparangna Post Retirement Benefits-ko on·china gitaba association dabiangaha.
