TURA: July-ni 10 tariko South Garo Hills a·jani Krishi Vigyan Kendra (KVK), chang 24-gipa National Fish Farmers Day-ko KVK campus-o maniangaha.
A·song gimikon na·tok jile cha·enggipa manderangni kamrangna mittelpilskana gita ia salko maniangaha aro ia program-ko ong·atanio, KVK South Garo Hills-ni Head aro SMS (Agricultural Engineering) Ningthoujam Bishorjit, na·tok jile cha·enggipa manderangni chu·sokani aro neng·nikanirangko agan-talate on·angaha.
Ia program-ko ong·atanio, SMS (Fisheries) Thongam Monika Devi, na·tok man·aniko bariatani aro na·tok jilanichi laprangko man·ani bidingo agan-talate on·angskaaha.
Ia National Fish Farmers Day-ko manianio, South Garo Hills a·jani Chokpot Block ning·o donggipa dam 9 songrangoni gimik sak 25 na·tok jile cha·enggipa manderangna na·tok bi·sarangkoba suale on·angaha.
