SHILLONG: Meghalaya a·doko niamrangko jaktango ra·enba ILP checkpoint-rangko songe, a·dokona re·ruraenggipa manderangko nirok sandienggipa dolrangni kosako sorkari maming ja·kurangko de·jaenga ine agananiko a·dokni Chief Minister Conrad Sangma jegalataha aro iandakgipa dolrangni kosako sorkarini ja·ku de·anirangko koborrango gatjaenga ine media-kosa matnangatskaaha.
Batanggimin bilsirangonin dingtang dingtang dolrang, niamrangko jaktango ra·e, dingtang dingtang nok aro ramarangko tarienggipa manderangoniko lekkarangko sandienba, mitamrangkode Assam aro dingtang dingtang biaprangona watpilatrongengachim ine nikna man·a.
Bang·a biaprangon iandake dingtang dingtang dolrang, niamrangko jako ra·e gipin biaprangoni re·bae kam ka·gipa manderangni lekkarangko am·sandianio, kam ka·enggipa manderangko kragija dake jak sokanirangkoba bang·en nikna man·ahachim. Iandakgipa dolrang, bang·a biaprangon, gipin biaprangoni re·bae kam ka·gipa manderangko doke sate roengoba aro mitamrangko biaptangtangona watatpilengoba police aro sorkarini maming ja·ku de·anirangko nikna man·rongskajachim.
Mongolbar salo iandake NGO-rangni, Shillong songjinmao kam ka·enggipa manderangni lekkarangko am·sandianio kragija dake dokgipani bidingo sing·anina aganchakaniko on·angengon, kam ka·e cha·enggipa manderangna work permit-rang donga aro iandakgipa manderangna Labour department-ni gita registration-ko ka·enga ine Chief Minister parakataha.
Kam ka·e cha·enggipa manderangoniko darangba iandake lekkarangko am·sandina bilrang dongja ine janapatengon, basakobarangde NGO-rang iandake kam ka·e cha·enggipa manderangko nirok sandironga indiba ian niam gita ong·jaenga ine Sangma aganaha.
“Uamang niamko pe·ani gita ong·enga, uni gimin iandakgipa dolrangni kosako mingbri case-rangko ka·aha,” ine Chief Minister parakataha.
Meghalaya a·doko Inner Line Permit aro MRSSA-ko sorkari ra·gate on·jaenga ine matnangenba, KSU-ni membor-rang, ILP check point-rangko songe, re·ruraenggipa aro a·doko kam ka·e cha·enggipa manderangko am·sandiengachim ine nikna man·a.
Iani bidingo sing·anina aganchakaniko on·angengon, ILP-ko ra·gatanide a·dok sorkarini jako ong·ja aro MRSSA-koba a·dokni Governor, Home Affairs Ministry-na watataha indiba taridapna nanganirang dongkuenga ine Ministry, a·dokona watatpilahani gimin iako a·dok sorkari da·o nipiltaikuenga ine Chief Minister parakataha.
NGO-rangni iandake kam ka·giparangko sandirokaniara dingtang dingtang project-rangko champengani gita ong·enga ineba Sangma talataniko on·angaha.
“Saoba maikoba nangnikenga ong·ode chinga uamangna talate on·na man·aigen indiba niamko jaktango ra·aniara niamni a·palo ong·enga. Iandakgipa dolrangni kosako sorkari nanga gita ja·kurangko de·anggen,” ine ua aganaha.
Durand Cup-ko sokachakna gita Shillong-o kam ka·soenggipa manderangko dokani gimin sing·on, ua an·tangde ia a·selni bidingo name ma·sikuja indiba ong·gija kamrangko ka·gipa dolrangni kosako sorkari nanga gita ja·kurangko de·chongmotgen ine Chief Minister ku·rachakaniko on·ataha.
