SHILLONG: Re·anggipa July-ni 6 tariko, East Jaintia Hills a·jani Umpleng songo mande sakbriko so·otanio jak dongani gimin police-rang, mande saksako rim·na man·aha.
East Jaintia Hills a·jani Superintendent of Police (SP) Giri Prasad-ni kobor ra·timgipa manderangna parakatani gitade, ia a·selni bidingo police-rang sandirokanirangko dakkuengani gimin rim·a man·gipa mandeko parakna man·kujaenga.
“Re·anggipa July-ni 6 tariko, mande sakbrini manggisirangko Umpleng songo man·ani ja·man police-rang am·sandianirangko dakenba, ia mande sakbriko so·otanio jak donggipa mande saksako rim·na man·aha,” ine Prasad aganaha.
Ia mande sakbriko so·otanio jak donggipa gipin manderangkoba rim·na gita police-rang sandianirangko dakengkua ineba SP parakataha.
So·ota man·gipa mande sakbriara, drugs ba pekatgipa samrangko jakkalgipa aro badingsrukgiparang ong·achim ine adita salrangna skangsan police-rang parakatahachim.
