TURA: Salsa salgni skangmangmangsan Garo Hills-ni a·kawe jolrango chi bananirang tipanganichi manderang rang·speaniko man·ahaoba, re·anggipa walonin dontonggija mikkarang waangtaiahani a·sel Phulbari jolo donggipa Chibinang aro uni wilwilao Rongai chibima dal·bae, chi bananirangko nikna man·taiaha.
Chi banenggipa biaprangko a·dokni Power Minister aro Phulbari-ni MLA AT Mondal niangaha aro uni parakatani gitade, 2014 bilsio gitan ia changoba chi bananirangko nikna man·taiengahachim.
2014 bilsio Garo Hills-ni bang·bata biaprangon chi bananirangko nikna man·ahachim aro bang·a biaprangon manderang sina gitaba nangahachim.
Koborko on·ani gitade, Chibinang jolrango donggipa bang·bata songrangon chirang banaha aro ramarangkoba chi mripe da·o manderang re·ruraanirango neng·nikanirangko man·tokengaha.
Phulbari samba jolrangoba chirang dal·bae bang·a songrangon banengaha aro da·o obostarang re·anggipa antiona baten namjabatengaha ine kobor on·timgiparang parakataha.
Re·anggipa antiosan a·dokni Chief Minister Conrad K Sangma, a·kawe jolrango chi bangipa biaprangko niangahachim aro kobor on·timgiparangni aganani gitade, ia chango chi bananirang bilongbatengaha.
“Ia chango chi bananirang, 2014 bilsio chi banani gitan apsanangaiengaha aro Chibinang jolrango donggipa bang·a songrangkon chi bantokaha. Ia songrango chini tu·ani ja·sku sokengaha aro mikkarang dontongjagenchimode obostarang namjabatangnaba gnang. Chi bananichi neng·nikanirangko man·enggipa manderangna pilak nanga dakchakanirangko on·na chinga district administration baksa agangrikjringenga,” ine a·dokni Power Minister AT Mondal parakataha.
Re·anggipa antiosan District Administration, chi bananichi neng·nikanirangko man·enggipa biaprangna salsnini gratitious relief (GR)-ko parakatahachim.