Niamko an·tangtang jakkepjachina Cong dilgipa, Pressure group-rangko didia

SHILLONG: Kam ka·ani permitrangko aro labour license-rangko Pressure group-rangni chek ka·aniko an·tangtangni jako ra·e chek ka·aniko niam gri ine a·dok sorkarini agangenchimoba manigija sandiangkue a·selrang ong·anirangna niamrangko sakantian ja·rikchina a·dokni congress didiaha.
“Sorkari aro pressure group-rang niamko ja·rikna nanga. Sakantian niamko an·tangtang jako ra·aia ong·ode obostarang namjawa an·ching niamko ja·rikode aro niamrangko dal·e ra·na nanggen,” MPCC, Chief Vincent H Pala aganaha.
Sorkari dake mesokdilani gimin sing·on, sorkari, pressure group-rang aro songpanggiparang niamko ja·rikna nanggen aro unosa an·ching jeonba sokna gita man·gen, ua aganaha.
Kam ka·giparangko doka-satani aro niam gri chekking ka·anichi naljokani ong·ja ine mitamrangni kenani gimin sing·anina, ‘‘Ong·chongmota, a·doko na·a maiba namgijako dakode gipin a·doko maiaba namgija ong·naba donga aroba tom·tomatani pal nangai-nangjae golmal ba neng·nikaniko ong·atskaenga,’’ ua aganaha.
“Niamko ja·rikode aro songpanggipa niamko ja·rikode nambatgen aro jemangan neng·nikani dongja uamang uno neng·nikani donggen. Uko an·ching ma·sina nanggen,” ua agandapaha.
Kam ka·giparangni lekkarangko chekking ka·na jeba mande ba dol niam gri ong·a ine Chief Minister Conrad K Sangma-ni aganako man·oba KSU ia kamko ka·kuenga.
Rika-dakani kamko ka·giparangoni petrol pump-o, dokkanrango aro cha dokkanrango donggiparangko Shillong-oni a·dokni gipin biaprangrangona union chekking ka·roroangaha.
Shillong-o pressure group-rangni da·o chekking ka·ani gimin sing·ao kam ka·ani permit gita maming dongja, Sangma ru·utgija salo aganaha.
Labour Department-o kam ka·giparangko biming segatani kamrangko ka·ani kam donga. Iako uamangni naljokanina aro uamangko serikna dakaha, ua aganaha.
Kam ka·giparangni lekkarangko chek ka·na darangba bil dongja, je mandean ba dolrang chek ka·a ian niam gita ong·ja, niam gri ong·a, Sangma aganaha.