Shillong: Re·anggipa July 6 tariko East Jaintia Hills-ni Umpleng-o sakbri manderangko so·ote galani mamlao East Jaintia Hills police, Sombar salo gipin sakgni manderangko rim·dapna man·aha.
East Jaintia Hills SP, Giri Prasad M u·iata je, mande so·ote galani mamlao da·o dipet gimikchi sakgittam manderangko rim·na man·aha. Indake ong·engon, sandirokanio ja·donggaaniko man·jana gita rim·a man·gimin manderangni bidingode mamingkon parakkujawa ineba ua aganaha.
Unigisepon mande so·otani jak donggipa gipinrangkoba rim·tokna gita sandianirangko dakenga ine SP aganaha.
So·ota man·gipa sakbri manderangko uamangni nokdangni manderang a·kangtokaha, uamangara Patha Elam, Nepal-oni Ravi Rai (23), Koshi, Anchal, Nepal-oni Rajesh Rai (26) aro Dkhiah East Pohshnong, East Jaintia Hills District-ni Nasar Kyndait (33) aro brigipara Loba Tamang ong·achim.
Dos dakgiparangni kosako Khliehriat police station mokordomako segataha.
