Nurse-rangko kamo rakkiani bewalko GSU jeata

SHILLONG: A·doko sanna banna a·bao nirok-simsakaniko dakna gita nurse-rangko permanent post-rango rakkigija contratual-o rakkiengani gimin Garo Students Union, Western Zone (North) Director of Health Services, Meghalaya-ni kamna suk ong·gijaniko parakataha, aro iandakgipa kamara kam ka·na sikenggipa nurse-rangko kusi ong·atja ineba aganaha.
Kamo rakkiani tarikrangko dingtangatsimani aroba tik ong·gija advertisement-rangko on·aniara kam ka·na sikenggipa nurse-rangko jajaata, jemangan a·dokni healthcare sector dangdike on·na gita kusi ong·engachim. Nurse-rangan healthcare system-ni pangchakani ong·a, unomitingo uamangko cantractual post-rango rakkianiara uamangni mikkangchi kang·kare kae kam ka·gnikoba olgrokata maina uamang an·tangtangni kam mikkangchi mai ong·genchim uana jajrengsoani gnang, union aganaha.
Iandakgipa bewal-o nurse-rangko kamo rakkiaiode uamangni changa sapanio tang·dogniko ja·donggaata aro sanram a·barango uamangni namedake dangdike on·gnikoba jajaata. Unigimin a·doko sana banani a·bakuko tang·doatna aro manderangna nambate dangdike on·na man·a gita nurse-rangko kamo rakkiani bewalko nipiltaichina gita GSU, Directorof Health Services, Meghalaya-ko didiataha.