Tura-o, Labour Corps Day-ko maniao A·chik matgrikrangko gisik ra·a

TURA: Tura, Lower Babupara, Cenotaph-o 69-gipa Garo Labour Corps Day-ni 106-gipa Anniversary-ko maniaha. Ia salko 1919 bilsionin bilsiantian July 15 tariko A·chik matgrikrangko gisik ra·e uamangko gisik ra·na tarie dongipa biapo bibalrangko done manibarongenga. Manianio niksenggipa dilgiparang dongpaaha. Ia maniani tom·ako West Garo Hills, Tura Munisipal Board ong·ataha.
Maniani tom·ao West Garo Hills Tura-ni Additional Deputy Commissioner, Dolrich B G Momin, Chief Guest ong·e manianiko mikkim chaataha aro un baksana tom·ao dongpagiparangni gisepo Deputy Superintendent of Police, West Garo Hills, W M Momin, Chairman, Tura Municipal Board, J D Sangma, President Nokma Council, Tura Skylance G Momin, gipin gipin Official-rang, Senior Citizen-rang aro Tura Municipal Board-ni staff dongpaaha.
Momin Chief Guest ong·e tom·ao aganao 69-gipa Garo Labour Corps Day-ni gimin aro First World War ong·mitingo France-o 69-gipa Garo Labour Corps-ni kamna rim·anirangko man·e uamangni kam ka·anirangni bidingo agan-talataha.
Ia sal Corps-ni memborrangni naljoke sokbapilaniko aro First World War-o France-o 69-gipa Garo Labour Corps-ni rim·ako man·giparang ong·e uamangni kam ka·anirangko aro jemangan siaha uamangko gisik ra·e dingtangmancha gisik ra·na maniani sal ong·a.
Ua rimangako man·giparangko mande ra·e aro gisik ra·ani chin Garo Labour Corps Day-ko sianggipa janggirangko mande ra·e bi·a gnang aro Salami ra·e Babupara-o Cenotaph-o niksenggipa dilgiparang bibalrangko done kragipa bewalo maniaha. District Police aro 2nd MLP Battalion Goeragre Salami ka·aha aro maniao sianggipa janggirangko gisik ra·e minit gnina jrip jrip donge maniaha