State president-ni kosako ja·ku de·ako nangnika
TURA: Garo Hills-ni a·kawe jolrango songdonggiparang, Anti Corruption Foundation of India (ACFI) jemangkon state body memborrang ine official-ni gita ma·sigiparangni kam ka·aniko dontongatchina Meghalaya Chief Secretary-na see on·e dabiangaha, ja·kol sana man·ja indiba a·dokni a·palo organization-ni headquarter-ni gita manderangko rakkiangani ning·o anti-corruption agent-rangko rakkiaha, uamang an·tangtangni gadangko jakkalsretenga aro dingtang dingtang badingchiwalgiparangoni dabidrakenga ine uamang matnangataha.
Post-rangna dilgiparang jekai Meghalaya State President, State Secretary aro Chief Executive Officer-ko Rajabala biapna Haryana-oni ACFI-ni gita songaha aro skanggipa matnangataniko gapatanganichi tangka cha·anio uamang gimikan bak dongpagiparang ong·a aro dingtang dingtang official-rangni kosako ka·mikenatanirangko dakenga, uamangna bang·a tangka paisarangko on·skae uamangni matnangatgipa ra·pilchina ka·mikenata, ine songdonggiparang matnangataha.
Butbar salo Rajabala Higher Secondary School-o niamgri skigiparangko rakkianina matnangatgipani bidingo saksa dilgipa Abdur Rup Choudhary uni matnangataniko ra·pilaniko ma·sie songdonggiparangni gita matnangani sokbaaha. Choudhary ACFI-ni Meghalaya state president-ni post-ko ra·ani ong·naba donga.
Mijamangmang, Choudhary, SMC-ni President aro Secretary-ni gita Rajabala Higher Secondary School-o sakgni skigiparangko niamgri rakkianganina matnangate DSEL-na seataha. Matnangataniko file ka·ani ja·man aditang salrango Choudhary Butbar salo matnangatani term-ko rongtalen nakatataha jekon ua an·tangan file ka·a, ua tol·gipasa, mamingoba pangchakja aro bak nanggipa ong·ja ine aganangpilaha.
Gisiko nangatani, Butbar salo uni matnanganiko Choudhary ra·pilgenchimoba skulni ma·gipa pagiparang baksana manderang skulo niamgri kam ka·engani apsanni bidingo DSEL-na matnangataniko watataiaha. Apsan skulo SMC-ni sakgni memborrangni name kam ka·gijaniko parakatna re·mikkangaha, ia mamlani gimin songtangni AMMSU sing·doaniko dakangaha.
Choudhary-na komibeoba tangka lak 5-ko on·aha, uni matnanggipako ra·galpilchina dake tangka paisako on·aha ine songdonggiparangni gita Bristibar salo matnangataha. Songdonggiparangni gita matnangatgipao Sariyah Hoque and Mozidur Rahman, ACFI Meghalaya State Chairman aro District Coordinator-ni gita soi ka·aha.
Choudhary-nni kosako ja·ku de·china gitcham ACFI memborrang aro songdonggiparangni gita nangrime matnangatgipao dabiaha. Choudhary-ni ning·o niamgri kam ka·chimonggiparangko am·sandina nangchongmotgipa authority-rangko matnanggipao mol·molangaha.