Meghayala-oni sak 80 student-rangko Bangladesh-oniko rimbapila

SHILLONG: Golmal ong·enggipa Bangladesh-oniko Meghalaya-oni sak 80 student-rangko Dawki border ba sima ari gita naljoke rimbapilaha.
Meghalaya-oni sak 80 -ko man·gope sak 405 student-rangko Dawki sima ari gita naljokate rimbapilaha ine Chief Minister, Conrad Sangma aganaha.
A·dok sorkari, Dhaka–o donggipa Indian Embassy baksa melie kam ka·enga.
Indiba sorkari, Bangladesh-ni Eastern Medical College-o poraigipa sak 36 student-rangko naljokate rimbana neng·nikako man·enga.
Indiba sorkari, college authority aro official-rang baksa agangrikatenga. College authority-de student-rang namen naljoke dongenga ine aganataha, indiba sorkari, uamangkoba rimbapilna jotton ka·enga ine Sangma aganaha.
“Rama naljoka naljokgijako name dake u·ikuja dipetde obostako nichengaignok ine agankuaha.”
College-o jachange donggipa student-rangko konta 24 somoini gisepo naljokatna jotton ka·enga aro uamagnko Tripura gita rimbaskanaba donga.
Meghalaya-oni badita sakmancha student-rang Bangladesh-o donga, iako sorkari, name dake u·israngkuja uni gimin Indian Embassy-o sing·atenga.
Uandake changgipin Cabinet meeting-o a·dokni a·palona re·ange poraigipa studentr-angko register ka·na gita online portal-ni proposal-ko sorkari ra·chakkanggen, jedakode sorkari, iandakgipa neng·nikan sal somoirango gipin a·songo poraigipa student-rangni data-ko u·ie kam ka·na gita man·gen.
Bangladesh-o golmal ong·ao sak 39 manderang siaha. Dhaka-o police aro civilian-rangni gisepo nanggrikaha.