Social media-o me·chik activist-ko matnanganina MSCW-ni gitcham dilgipa jegala

TURA: Meghalaya State Commission for Women (MSCW)-ni gitcham vice chairperson Gamchi Timre R Marak, Tura-oni me·chik activist-ko aro pilak me·chikrangkon, social media-o matnangana suk ong·gijako parakaha aro iandakgipa kamko dontongchina mol·molaha.
Tura-oni women’s organisation-ni dilgipa saksani live TV-o Garo Talk show-o uni agangipa kattarangna social media-o matnangtoni gimin MSCW-ni gitcham dilgipa, chakate aganchakataha. Mija Bristibar salo Williamnagar-oni ma·giparang, Mothers’ Union aro Mothers’ Federation-ni ma·giparang, Marak-ni noko tom·bimonge social media-o bilsi bregimin me·chikko aro sakgipin me·chikrangkoba ong·ai ong·jai kattarangchi agane inteke raoni gimin chanchirimangaha aro iandake matnangako jegaltokaha.
“Chinga nokdangni, songsalni, mahari-ma·drangni ma·gipa ong·e aro a·song-chigatangko nirok-rakkigipa ong·e mande ra·ako man·gipa ong·a, uni gimin me·a-me·chik ong·ja maina gimikkon, saksa sakgipinko mande ra·grikchina mol·molata ine Marak, ma·giparangni palo aganataha.
Uandake Marak, ‘reels’-o content tarigiparangkoba kragipa content-rangko tarie upload ka·china mol·molaha. Maina social media-ko bi·sarangoni dal·gimin manderang nitoka uni gimin bi·sarangna namgipa skianiko on·na gita kragipa content ba video-rangko taripaode namgen, maina ong·gija dakgipa video-rangko tarie social media-o wataniara songsalna kratcha·aniko ra·baa, ine Marak, aganaha.