TURA: 2022 bilsio a·dok sorkarini songe on·gipa Batabari C&RD Block-ko da·onan chalaichipkujaengani a·sel dingtang dingtang kamrangko ka·anio neng·nikanirangko chagrongna nangenga ine All Meghalaya Minorities Students Union (AMMSU) parakatenba, Batabari jolo songdongenggipa manderangni namgnina ia block-ko ta·raken chalaichina a·dokni Chief Minister Conrad K Sangma-ko didiataha.
AMMSU-ni president Nur Islam Sk-ni parakatani gitade, Batabari C&RD Block-ko 2023 bilsini Assembly election-na skang NPP-chi dilenggipa MDA sorkari, 2022 bilsini December 21 tariko songe on·ahachim aro ia gital block-na block development officer (BD) baksana gipin kam ka·giparangkoba ra·manahachim indiba da·alonan ia block office-ko chu·gimik chalaikujaengachim.
“Batabari C&RD Block-ko songe on·ani ja·manba da·onan mitam kamrangkode Selsella C&RD Block-onisa ka·engani a·selan Batabari Block-ni ning·o donggipa manderang neng·nikanirangko chagrongna nangtokenga aro Selsella-ona indita chel·begipa ramako an·tangtangni kamrangna songre songgabatna nangtokkuenga,” ine AMMSU-ni president parakataha.
Batabari C&RD Block-ko chu·gimik chalaikujaengani a·sel Selsella Block-ni ning·o donggipa bang·a songrangan neng·nikanirangko chagrongna nangtokenga ine janapatskaengon, Batabari C&RD Block-ko chu·gimik chalaikujaengani a·sel MGNREGA-ni kamrango VEC-rang chu·gimik kamrangko man·tokkujaenga aro Selsella Block-o bill-rangko somoi gita gamjaengani a·sel manderang an·tangtangni man·na nangkuenggipa tangka paisarangko man·tokkujaenga ine AMMSU-ni president parakataha.