TURA: South Garo Hills a·jao sanna banani kamrangko nambatatchina gita A·chik Conscious Holistically Integrated Krima (ACHIK) dabiangaha.
Iani bidingo Health Services-ni Director-na sedoatengon, South Garo Hills a·jao donggipa pilak primary health centre (PHC)-rangko Community Health Centre (CHC)-ona ra·doatchina, Baghmara Civil Hospital-na specialist doctor-rangko on·china aro hospital-o jakkalenggipa sanna banana kolrangko ra·doatchina ACHIK dolni vice president Greneth M Sangma didiataha.
Baghmara Civil Hospital-na specialist doctor-rangko on·china didiatengon, ia hospital-na gynaecologist, psychologist, ENT specialist aro uandake kam changgipa doctor-rangko permanent basis-o watatchina Sangma didiataha.
Mindikgre sub-centre-ko man·chape South Garo Hills a·jani pilak sub-centre-rangko PHC-ni gadangona ra·doatskachina gitaba ACHIK, Health Services-ni Director-ko didiataha.
