SHILLONG: Meghalaya a·dokni dingtang dingtang nanganirang, mongsongbate Inner Line Permit (ILP)-ko ra·gatchina dabiani, Khasi aro Garo ku·sikko Eighth Schedule-o napatchina dabiani aro Assam-Meghalaya a·dokni simarango ru·uta bilsirangna meligrikgijanirangko namatani bidingo ma·mong sorkari baksa agangrikna Hynniewtrep A·chik National Movement (HANM) tik ka·angtaiaha.
Meghalaya a·dokona re·bae kam ka·e cha·enggipa manderangoni sak 2500-mangni gita EPIC, Aadhar ba PAN card-rangko mesokna man·jahani gimin ia manderangko KSU-ni membor-rang, biaptangtangona watatpilani ja·man HANM-ba a·dokni nanganirangko ma·mong sorkari baksa agangrikna tik ka·angaha.
Meghalaya a·doko ILP-ko ra·gatchina sorkariko didina gita maming lekka gri a·doko kam ka·enggipa manderangko am·sandienba biaptangtangona watatpilna KSU ku·rachakaniko on·angkuahachim.
Iani bidingo kobor ra·timgipa manderang baksa agangrikengon, Meghalaya aro Assam-ni simarango ru·uta bilsirangonin meligrikna man·jaenggipani bidingo kamrangko niatchina gita Home Affairs Ministry, Central Division-na ge·etaniko on·aha ine HANM-na chitti seachi u·iataha ine HANM-ni president Lamphrang Kharbani parakataha.
“Khasi aro Garo ku·sikrangko Eighth Schedule-o napatchina dabienggipani giminde India sorkari, nanga gita ja·kurangko de·na ku·rachakaniko on·atahani gimin ian chu·sokgipa ong·gen ine chinga ka·dongenga indiba baksa ong·gen ukosa ma·sikuja,” ine Kharbani aganaha.
Meghalaya a·doko ILP-ko ra·gatchina dabienggipani bidingo janapatskaengon, da·o dipet ILP-ko on·genma on·jawa India sorkari name aganchakaniko on·kujaenga, uni gimin uamang Delhi-ona re·ange, a·doko songdongenggipa manderangni ru·utbea bilsirangna dabienggipa ILP-ko on·china ma·mong sorkari baksa agangriketaigen ine HANM-ni president parakataha.