SHILLONG: A·gilsako technology ba gital kolrangni tang·dobaroroenganichi Meghalaya a·dokoba ki·tap gri bida budiko on·na gita a·dok sorkari cholrangko nienga.
A·dokni Education Minister Rakkam A Sangma-ni aganani gitade, a·gilsak gimikon technology tang·dobaroroengani gimin Meghalaya a·dokoba lekka ki·tap gri aro classroom-rang gri bida budiko on·ani cholrang dongenga.
Shillong College-o National Education Policy 2020-ni bidingo workshop-ko ong·atanio jinmana aganprakangengon, a·gilsak gimikon technology tang·dobaroroengahani gimin a·dokoba apsan daken technology-ko ja·rikna nanggen aro mikkangchi lekka ki·tap gri aro classroom-rang gri bida budiko on·ani cholrang donga ine Education Minister aganaha.
Re·baenggipa academic session-onide Meghalaya Board of School Education (MBOSE)-ni ning·o class 9-oni class 12-ona, textbook-rango on·gipa QR code-rangko jakkalgnok ineba Sangma parakataha.
“Ia QR code-rang dingtang dingtang poraiani bosturang aro video-rang baksa nangchapgipa ong·e chatro chatrirangna, mongsongbate songadam nokadamrango bida budiko ra·anio dakchakanirangko on·gen,” ine ua aganaha.
A·gilsako ding·a sin·a batroroani aro kamrangko man·na neng·ani bidingo lekka porani gita namatna nangengani giminba Education Minister aganangaha.
Ia workshop-ko Shillong College-ni ning·o donggipa Science Education-ni Diamond Jubilee-ko maniani bak gita ong·atangaha aro ia workshop-o EN Dkhar, Shillong College-ni IQAS Coordinator S Sarma, Shillong College-ni Principal E Kharkongor aro gipinrangba dongpae jinmana aganprakangaha.