ATM-rango chonchongipa gongni note-rangkoba donchina ACHIK dabia

TURA: Tura songjinmao donggipa automated teller machine (ATM)-rango chonchongipa gongni tangkarangkode man·rongjani a·sel nangana tangka oke jakkalenggipa manderang neng·nikanirangko chagrongna nangtokenga ine A·chik Conscious Holistically Integrated Krima (ACHIK) dol parakatenba, ATM-rango pilak gongni tangkarangkon donchina dabiangaha.
Iani bidingo Tura State Bank of India (SBI)-ni Lead Bank Officer-na badi ka·e sedoatengon, Tura-ni pilak ATM-rangon chonchongipa gongni tangkarangkode man·rongjaengani a·sel manderang an·tangtangni nangana bate tangkarangko okna draatako man·enga ine ACHIK dolni dilgiparang parakatenba, ATM-rango pilak gongni tangkarangkon donchina didiataha.
“Bang·a changon ATM-rango gong 10, gong 20, gong 50, gong 100 aro gong 200-ni tangkarangkode man·rongja ine chinga chinga nikna man·aha aro manderangni badi ka·anirangkoba man·sorongenga. ATM-rango gong 500-na bate komigipa gongni tangkarangko man·rongjani a·selan manderang an·tangtangni nangana bate tangkarangko okna draatako man·ronga,” ine ACHIK-ni dilgiparang janapatenba, bank-rangan manderangna iandake chonchongipa gongni tangkarangko on·jaenga ong·ode bazaar antirango bakan tangka paisani gita neng·nikanirangko man·gnok aro economy tang·onanggnok ine mikrakataniko on·angaha.
ATM-rango chonchongipa gongni tangkarangko donchina Reserve Bank of India (RBI)-ni gita ge·etaniko on·manahachim ine janapatengon, ia niamko da·ona kingkingan Tura-ni ATM-rangode ja·riktokkujaenga ine ACHIK-ni dilgiparang parakataha.