AMPATI: Meghalaya sorkarini CM-Connect-ni ning·o dingtangmancha Block-Level Community Interaction program-ko Bristibar salo, South West Garo Hills a·jani Ampati Mini Stadium-o ong·atangaha aro ia program-ko ong·atanio a·dokni Chief Minister Conrad K Sangma an·tangan manderangni dingtang dingtang nangani aro neng·nikanirangko knatime ra·angenba, manderangni nanganirangko chu·sokatna kang·kare ka·e ra·angaha.
Ia program-ko ong·atanio pilak department-ni officer-rang aro district official-rangba bakko ra·e, manderangni sing·ani aro nanganirangna agan-talatanirangko on·angaha.
Manderangni dingtang dingtang nangani aro neng·nikanirang, jekai rama jal·lang tariani, chi man·gijani, bijoli tik ong·gijani, lekka pora aro uandakgipa dingtang dingtang kamrangni bidingo songni manderang, an·tangtangni nangani aro neng·nikanirangko a·dokni Chief Minister-na aro sorkari official-rangna agan-talate on·angtokaha.
Ia program-ko ong·atanio a·dokni Chief Minister, manderangni agananirangko knatime ra·enba mitam nanganirangkode apsan salon matchotate on·angjolaha. Mitam case-rangkode ua name tale am·sandienba, cholrangko sandina ku·rachakangskaaha.
CM Connect-ni bidingo jinmana talataniko on·angengon, manderang an·tangtangni nanganirangko aro neng·nikanirangko 1971 helpline nombor gitaba sorkari official-rangna u·iatna man·gen ine Chief Minister parakataha. Songni nokni namgnina kamrangko nambate chu·sokatchina gitaba ua, sorkari official-rangko didiangaha.
Ia program-ko ong·atanio dingtang dingtang songni dolrangna aro dingtang dingtang kamrangna gimik gong kror 3.20-ni cheque-rangkoba on·angjolaha.
Ia program-ko ong·atanio, dingtangmancha CM Elevate program-ni bak gita agriculture response vehicle-rangkoba Garo Hills gimikni mande sakbongana pakwate on·angaha.
Ia program-ko ong·atanio dongpae bak ra·anggipa gipin manderangara, a·dokni Power Minister AT Mondal, Salmanpara MLA Ian Botham Sangma, Mahendraganj MLA Sanjay A Sangma, Rangsakona MLA Subir Marak, Boldamgre MDC Stevie Marak aro gipinrang ong·a.
