TURA: Matchakolgre Multi-Facility Centre (MFC) Hall-ko Budbar attamo, a·dokni Chief Minister Conrad K Sangma nokdonggae on·angaha aro ia nokko nokdonggae on·anganio, Mahendraganj-ni MLA Sanjay A Sangma, West Garo Hills a·jani Deputy Commissioner Jagdish Chelani, Tura Municipal Board (TMB)-ni Chief Executive Officer Rikse R Marak, dingtang dingtang department-ni officer-rang aro jolo songdongenggipa manderangba dongpae bak ra·angaha.
Matchakolgre MFC Hall-ko nokdonggae on·anganio a·dokni Chief Minister, jinmana aganprakangengon, Matchakolgre-o ia MFC-ko kulina gita kamrangko ka·ahani gimin Matchakolgre Development Committee-ni membor-rangko mittelpilangaha.
A·dokni chadamberangna YESS Meghalaya Project-ko ra·gatanio chu·sokgipa ong·ahani gimin an·tangni kusi ong·aniko parakangengon, ia YESS Meghalaya Project-na dorgastorangko galchina aro dingtang dingtang program-rangko ong·atchina gita a·dokni Chief Minister, jolni chadamberangko didiangaha.
Chadamberang ia cholko ra·e an·tangtangni namgnina kamrangko ka·na man·na gita ia project-na tangka chamaniko gong kror 4-oniko changchikking bate bariataha ineba ua aganaha.
Dingtang dingtang training program-rangko ong·atna gita sorkari tangka paisani gita dakchakanirangko on·enga ine janapatengon, Matchakolgre Development Committee, me·chik dol, chadambe dol aro uandakgipa dingtang dingtang dolrangko, skill development aro uandakgipa training program-rangko ong·atchina Chief Minister didiangaha.
Batanggimin bilsi bongani gisepo a·dokni Chief Minister aro jolni MLA ong·e ua dingtang dingtang namroro silroroani kamrangko ra·bana kamko ka·aha ine janapatskaengon, Smart Town project-ko ka·angkuna gita skango watchanggala man·gipa gittimrangoba rama jal·langrangko namdapatna jako ra·gnok aro Street Light Project baksana Tura Beautification Project-ni gnigipa bakko dingtang dingtang junction-rango a·bachengatgnok ine Sangma parakataha.
Water Supply Scheme-ni bidingo janapangskaengon, manderangni namgnina dingtang dingtang gittimrango gital Overhead Water Tank-rangko rikaha aro Mondol Tilla-o gong kror 1.4 koros ong·e rikgipa chi tengkiko Budbar pringosan oprake on·aha ine Chief Minister parakataha.
