SHILLONG: Meghalaya a·dokni SSA skulrango Non-Teaching staff ong·e kam ka·enggipa manderangni dormaharangko bariatchina dabianiko sorkari chu·sokate on·na gisiko nangjaengani gimin re·baenggipa July 29 tarik dipet indefinite ba ari gri asonge jingjengatna tik ka·angaha ine All Meghalaya SSA Non-Teaching Staffs Association (AMSSAANTSA) parakataha.
Association-ni parakatani gitade, Bristibar salo uamang Shillong songjinmani Malki kal·chakramo jinma tom·e chanchirimangani ja·man, uamangni dabienga gita dormahako bariatna sorkari ku·rachakaniko on·jaskal asonge jingjengatna tik ka·angaha.
“2016 bilsionin SSA skulrango Non-Teaching staff ong·e kam ka·enggipa manderangni dormahako bariatchina dabiengoba da·alonan chingna maming ku·rachakaniko on·kujaengani gimin, chingni dormahako bariatna ku·rachakaniko on·kujaskal chinga July-ni 29 tarik Sombar sal dipet ari gri asonge jingjengatna tik ka·angaha,” ine AMSSAANTSA-ni general secretary Barikupar Mylliemngap parakataha.
Mylliemngap-ni aganani gitade, uamang ru·uta bilsirangonin uamangni dormaharangko bariatchina dabienggipani bidingo Education Minister-na gisik ra·atpiltaianiko on·angahachim indiba uamangni dabianiko niatgen ine aganana agrede Education Minister, uamangna maming ku·rachakaniko on·jahachim.
Ia Non-Teaching Staff-o SSA-ni office ning·o cluster level, block level, district level aro state level-o kam ka·enggiparangkoba man·chapachim.
AMSSAANTSA-ni parakatani gitade, SSA Non-Teaching staff-ni dormahako bariatna gita proposal-o nangchakegipa file-ko finance department-na watatmanaha ine Education Minister Rakkam Sangma an·tangan, 2023 bilsini Assembly session-o parakahachim indiba da·alonan iani bidingo maming ja·kurangko de·kujaengachim.