SHILLONG: Meghalaya Legislative Assembly-ni Autumn Session-ko August 23 tarikoni August 30 tarikona ong·atanggen ine Sukrobar salo, Assembly-ni Speaker Thomas A Sangma parakataha.
Ia Autumn Session-o salbonga kam ka·ani salrang donggen, jeon salgittamkode government business-na aro salgnikode private membor-rangni kamrangna jakkalanggen.
Assembly Speaker-ni parakatani gitade, Assembly-ni Autumn Session-na tarigimin calendar-ko Business Advisory Committee (BAC) ra·chakmanaha.
“Autumn Session-na calendar-ko Assembly-ni Business Advisory Committee ra·chakmanahani gimin ia session-ko August 23 tarikoni August 30 tarikona ong·atanggen. Re·anggipa bilsini Autumn Session baksa tosusaani ja·man chinga ia session-o salbonga kam ka·ani salrangko donna tik ka·aha,” ine Sangma aganaha.
Assembly Session-o Opposition dolni dilgipako dingtangatani dongkujawa ineba Assembly-ni Speaker parakataha.
Da·o dipet Opposition dilgipani kamko Congress MLA Ronnie V Lyngdoh jako ra·kuengachim ine nikna man·a.
Saleng Sangma-ni Lok Sabha election-o seokako man·e MLA ong·aniko watangani ja·man Congress dolni MLA-rang sakbriona komiangahachim. Da·o dipet TMC-o MLA sakbonga aro VPP-o MLA sakbri dongskaengachim.
