SHILLONG: Ia bilsini gisepo ong·atna sienggipa KHADC aro JHADC election-o Hill State People’s Democratic Party (HSPDP), doltangari susana tik ka·angaha.
HSPDP, United Democratic Party (UDP) baksa Regional Democratic Alliance (RDA)-ko bikotahachim aro ia bilsini Lok Sabha election-oba uamang, HYC-ni gitcham president Robertjune Kharjahrin-ko common candidate dake susaatahachim.
Indake ong·genchimoba da·o KHADC aro JHADC election-ode HSPDP, RDA-ni gita ong·gija doltangari susaaigen ine HSPDP-ni president KP Pangniang parakataha.
Pangniang-ni aganani gitade, 2019 bilsini district council election-oba HSPDP aro UDP dolgnian doltangarisa susaaiahachim indiba Assembly aro Lok Sabha election-ode uamang nangrime susaskaahachim.
RDA-ara, election-na nangrime bikotgipa dol ong·ja indiba jatni nanganirangna bakrime ku·rang on·na bikotgipa dolsa ong·a ineba Pangniang parakataha.
HSPDP aro UDP dolrang, RDA-o apsan ong·angkuaigen ine janapatengon, HSPDP aro UDP dolnian, an·tangtangni miksongani aro niamrang donga ine Pangniang aganaha.
“Nangrime kamko ka·anichi jatni nangchongmotgipa kamrangko jako ra·e ka·na man·ani gimin dolgnini gisepo nangrimaniara namen nangchongmotgipa ong·a,” ine ua aganaha.
Da·o dipet RDA, a·dokko chalaina gita chu·gimik bilrangko man·kujaenga indiba basakobade ia miksonganiko chu·sokatna man·naba gnang ineba HSPDP-ni president, an·tangni ka·dongchakenganiko parakataha.
“RDA-chi chinga a·dok sorkariko rikna man·gen ine ka·dongenga aro ian a·doko songdongenggipa manderangnaba namgni ong·gen,” ine ua aganaha.