TURA: National Rural Employment Guarantee Act (NREGA)-ni ning·o bosturangko supply ka·enggipa manderang, Village Employment Council (VEC)-rangni bosturangna chamatenggipa chu·gimik tangka paisarangoniko 50 percent-kode kattirikengani a·sel Garo Hills-ni VEC-rangde 50 percent bosturangkosan man·aienga aro iani a·selan bang·a songrangon kamrangko matchotna man·tokpajaenga ine Robibar salo, Tura-ni MDC aro BJP-ni state vice president Bernard N Marak parakataha.
“Bosturangko supply ka·enggipa manderang, 50 percent tangkarangko kattienba, 50 percent bosturangkosan songni VEC-rangna on·engani a·sel kamrang matchotjaenga indiba ja·mano songni manderangkosa kam matchotja ine bodnam ka·skaenga. 50 percent bosturangchi dingtang dingtang kamrang jekai rama, tengki, dam aro uandakgipa kamrangko ka·na nangengani a·sel kamrang matchotna man·jaenga,” ine Marak parakataha.
Songni manderangna gamaha ine online app-o mesokgipa hajirarang, manderangni account-rangode napkujaenga ineba Marak parakataha.
“Mitam tangka paisarangkode dingtang account-rangko chipatenga aro mitam tangka paisarangkode songni manderango sing·chenggija kattiskaenga. Chingni dingtang dingtang songrangona wenanganio chinga bang·en iandake ong·gija dakgipa kamrangko nikna man·enga aro chingo dingtang dingtang app-rang dongani manderangna dongnue dongipa kamrangko chinga mesokna man·aigen. Mitam bank-rangde, manderangni tangka paisarangko okna re·angon, uamangni tangka paisarangkoba bi·rikenga. Iandakgipa kamrangni a·selan songni manderang neng·skime janggi tangna nangtokenga,” ine Tura MDC parakataha.
Marak-ni parakatani gitade, iarangni bidingo VEC secretary-rangna maming badi ka·anirang dongjaengani gimin songni manderang, iandakgipa kamrangni bidingo chanchichipanirang ong·kattokengaha.
“Tangka paisa jakkalsretani bidingo VEC secretary-rangko aro kamni bosturangna chamatgipa tangka paisarangoniko 50 percent kattiengani gimin supply ka·enggipa manderangko Block official-rang matnangtokenga. Da·o mingsa sing·anide ia kangal cholgri ong·pagipa songni manderangoniko sawa cha·uenga? Iani bidingo BJP, secretary-rangko okamenba sing·sandie ra·gen aro FIR-ko ka·an baksana ma·mong sorkarinaba report-rangko on·atgen. Meghalaya a·dokko BJP, NPP baksa nangrime chalaiengoba iandakgipa ong·gija kamrangko nikna man·aniara namen kragijani ong·a. Chinga bang·en badi ka·anirangko man·soaha aro VEC-ni kamrango ong·gija dakgipa manderangni kosako rakgipa ja·kurangko de·anggen,” ine BJP-ni state vice president parakataha.
