TURA: OMR sheet-rangko nipiltaiani bidingo Meghalaya Public Service Commission (MPSC)-ni talate on·aniko Garo Hills-ni Trinamool Congress (TMC) ra·chakna jechakataha aro iani bidingo jakgitele sandirokchina dabiangaha.
“OMR sheet-rangko nipiltaiani bidingo MPSC-ni aganchakaniko on·aniara result-ko parakanio mikkang niteani aro baseteaniko talatna man·jahani gimin chinga uamangni talataniko ra·chakna man·jawa. Ia neng·nikanirangko namatani pal pa·sikanirangko on·aniara jabolko ning·achi sike donaming apsanaienga,” ine TMC-ni youth leader Richard Marak parakataha.
Candidate-rangko seokanio pilak kamrangkon chu·gimik jakgitele sandirokna nangengani giminba Marak janapataha.
“MCS main porikkana list-ko on·taianiara an·tangtangni manderangna cholko on·na miksonganisa ong·a aro iani bidingo bang·a manderangan suk ong·gijaniko paraktokaha. Uni gimin candidate-ko seokanio maming mikkang niteani aro baseani dongjana gita iani bidingo chu·gimik jakgitele sandirokchina chinga dabienga,” ine Marak parakataha.
Advertisement-ni paragraph 8(1)-o MCS Main porikkana okamako man·gipa candidate-rang, bangbang ong·e dongenggipa biapna chang 15 batna man·jawa ine janapaniba dongani gimin ia additional list-ara niam gita ong·ama ineba Marak sing·doataha.
“Sak 62 candidate donggipa additional list-ara on·gimin 15:1 ratio-na batenga ong·ode ian niamko pe·ani gita ong·enga aro iako name sandirokna nangchongmota. MPSC-ni iandakgipa kamara, MCS porikkako ra·na dongimin niamrangko re·badeaniba ong·enga,” ine TMC-ni youth leader Richard Marak parakataha.