Kabul bazar-o gari donjachina mitam manderang ka·mikkenata
TURA: Sombar pringo, Assam a·dokni Krishnai jolo songdongenggipa mande saksani gariko, Tura-ni Kabul bazaar-o adita sak manderang dokkuchepenba nosto ka·aha aro uni ja·man para salgipa garini adita sak manderang, ia mandeko Kabul bazaar-o gari donjachina gitaba ka·mikkenataha.
Ia mandeara PWD-o contractor-ni kamko ka·enggipa Lohit Nath ong·achim aro ua kam nangani gimin Robibar salo Tura-ona re·baenba, an·tangni gariko Kabul bazaar parking lot-o done, abigipani noko waltueahachim.
Pringo ua an·tangni gariko start ka·na am·on, ma·sina man·gijagipa sak 3 ba sak 4 manderang, uni garini windshield-o dokpeaha aro garini handle-rangkoba nosto ka·e galangaha ine ua matnangataha. Iani bidingo ua Tura police station-ona re·ange badi ka·na am·on, police-rang uni case-ko jako ra·na sikjaha aro case-ko register ka·na gita ia a·selni CCTV video-ko mesokchina uko aganaha ine ua parakataha.
Uni case-ko police-rang jako ra·na jechakahani gimin ua an·tangni gariona re·bapilon, ua biapo para salgipa garini driver-rang, uona re·bae, ia biapo gariko donjachina uko ka·mikkenataha ine Nath parakataha.
Ia a·selni bidingo ua Assam-ni TV channel-rangna parakatani ja·mansa ia a·selko ma·sina man·aha aro iani bidingo ia mandeo sing·sandiaton ua an·tangna ong·a obostako talate on·enba, a·dok damgnini gisepo iandakgipa kamrangko chel·chakna a·dok damgnini sorkarirangko apsan nangrime kam ka·china ua didiataha.
Ia a·selni bidingo West Garo Hills a·jani SP AT Sangma-na u·iaton ua ta·raken ia a·selni report-ko bi·ataha aro ia a·selni bidingo sandirokna gita ASP-na pakwate on·ataha ine SP parakataha.
