TURA: Batanggimin sal somoirangonin dumper truck garirangni skatang salanichi Garo Hills-ni dingtang dingtang biaprango a·sel ong·anirangko aro manderangni so·ota man·anirangko nikna man·engon, re·anggipa Sombar saloba changsataie, Garo Hills-ni biap damsao apsan daken dumper truck gari bolsa, motorcycle bolsako salgaktaiaha aro ia a·sel ong·anichi motorcycle-ko salgipa janggitangko gimaatna nangaha aro unbaksana ramako ja·achi re·angenggipa sakgipin mandeba saknaanirangko man·na nangaha.
Koborko on·ani gitade, ia a·sel ong·ani, South West Garo Hills a·jani ning·o donggipa Chondonpara songo ong·aha aro sianggipa mandeara apsan songonin bilsi 30-mang ong·gipa Bilsrang R Marak ong·achim.
Ia a·sel ong·ani somoio sianggipa mande, Chondonpara-oni Garodoba-chipakna an·tangni motorcycle-o re·angengachim aro rama gonggegipao ua tempo bolsako overtake ka·na jotton ka·on, mikkangchini re·baskaenggipa dumper truck, uko salgakeaha aro ua biapon sikamaha.
Dumper truck gari, motorcycle-ko salgakani ja·man ia motorcycle ga·akenba, rama gita ja·achi re·angenggipa mandeko nangeskaaha aro uandaken ua mandeba aditan mata bu·anirangko man·na nangaha ine police-rang u·iataha.
Saknaa man·gipa mandeko sanna gita Belbari PHC-ona ra·angaha ineba kobor on·aha.
Police-rangni u·iatani gitade, ia a·sel ong·ani ja·man dumper truck gari, ua biaponi sale kataha aro da·o police-rang, ia gariko rim·na sandienga.