SHILLONG: United Democratic Party (UDP) aro Hill State People’s Democratic Party (HSPDP) dolrangni nangrime bikotgipa Regional Democratic Alliance (RDA)-o bakrimgenchimode doltangni miksonganirangkon pe·ani gita ong·gnok ine RDA-o bakrimchina okamaniko Voice of the People’s Party (VPP) jegalataha.
Iani bidingo talataniko on·angengon, a·dokni regional party-rang, jekai HSPDP, UDP aro uandakgipa dolrang, a·dokni manderangna name dangdike on·jaengani giminsa VPP-ko bikotaha aro da·o RDA-o UDP aro HSPDP dolrang baksa bakrimgenchimode VPP-ko bikotani namgnian dongjawaha ine VPP-ni ku·wattimgipa Batskhem Myrboh parakataha.
Re·anggipa April jao ong·atanggipa Lok Sabha election-o Shillong parliamentary seat-ko cheani ja·man VPP-ni dilgiparang namen ka·dongbataha aro da·o district council election-oba chena gita ka·dongtokengachim ine nikna man·a.
RDA-ko UDP aro HSPDP dolrang bikotahachim indiba Lok Sabha election-o uamang chu·sokna gita man·skajahachim.
“HSPDP aro UDP dolrang, a·dokni manderangna name dangdike on·jahani giminsa chinga VPP-ko bikotaha. VPP-ni miksonganirang namen bilakgipa ong·a aro iako manderang, batanggimin chang Lok Sabha election-o nikmanaha. Manderangan VPP baksa bakrimenga ong·ode chinga maina UDP aro HSPDP dolrang baksa bakrimna nanggen?” ine Myrboh sing·doataha.
RDA-o apsan bakrime kamrangko ka·na ine adita salrangna skangsan UDP aro HSPDP dolni dilgiparang, VPP-ko okamatahachim ine nikna man·a.