Garo Hills-o MGNREGA-ni hajirako somoi gita man·jaenga ine AHAM badi ka·a

TURA: Garo Hills-o Mahatma Gandhi National Rural Employment Guarantee Act (MGNREGA)-ni hajirarangko somoi gita man·tokjaengani a·sel songni nokni manderang neng·nikanirangko chagrongna nangtokenga ine A·chik Holistic Awakening Movement (AHAM) Central Executive Body (CEB) parakatenba, iani bidingo India sorkarini Union Rural Development aro Agriculture & Farmers Welfare Minister Shivraj Singh Chouhan-na sedoataha.
Union Minister-na sedoatgipa chittio AHAM-ni general secretary Clinton R Marak-ni parakatani gitade, 2005 bilsini August 25 tariko MGNREGA-ko a·bachengate on·anichi India a·songni pilak songadam nokadamrangon manderangna janggi tangani cholrangko on·na man·engachim indiba Garo Hills-ni mitam biaprangode songni manderang, baditaba jarangna an·tangtangni man·na nanggni hajirarangko man·tokkujaenga aro mitam block-rangode re·anggipa 2023 bilsionin hajirarangko man·chipkujae manderang neng·nikanirangko chagrongna nangtokengachim.
“MGNREGA-ni ning·o kam ka·e cha·enggipa songni manderang, mongsongbate me·chikrang aro kangal cholgrirang, an·tangtangni hajirana baditaba  jarangna sengna nangtokengani a·sel nokdangrangko chalaianio neng·nikanirangko chagrongna nangtokenga. Ian songni nokni manderangko onchepani gitasa ong·jaenga indiba songadam nokadamrango donggipa manderangni janggi tanganiko ra·dona sorkarini kam ka·anirango ka·donganiko gimaataniba ong·a,” ine Marak parakataha.
MGNREGS MIS-o mesokani gitade, MGNREGA-ni ning·o kam ka·e cha·enggipa chu·gimik nokdangrangoni 40 percent-de Scheduled Caste aro Scheduled Tribe-rangan ong·a ine janapatengon, uni gimin Garo Hills-o chagrongna nangenggipa neng·nikanirangko namate, pilaknan hajirako somoi gita sokatna nanga ine AHAM-ni general secretary parakataha.
Indake ong·engon scheduled area-rango MGNREGA-ni guarantee days-ko sal 100-oniko sal 150 ba sal 200-ona bariatchina, MGNREGA-ni labour budget-ko compulsory dakatchina aro tangka paisarangko ta·raken watatchina, ia scheme-ni ning·o unemployment allowance-ko on·china, project minganti aro bosti mingantinan NGO ba uandakgipa dolrangchi social audit ka·na on·na gita Block Development office-rangko ge·etchina gita AHAM, Union Rural Development Minister-ko didiataha.