AMPATI: South West Garo Hills a·jao Tourism-o bak ong·enggipa manderangna Labour, Employment & Skill Development Department-ni Meghalaya State Skill Development Society, Tourism Department baksa nangrimenba, song·a chananirangko skie on·na gita dingtangmancha skill training program-ko ong·atenga. Ia training program-ko Arrosa’s Kitchen baksa bakrime, Budbar sal dipet Ampati-o ong·atenga.
Ia training program-ko ong·atanio, dingtang dingtang homestay, restaurant aro fast-food-rango kam ka·giparang gimik sak 20 manderang, biming segatenba bak ra·enga.
South West Garo Hills a·jao gipin biaprangoni re·baenggipa manderangna namgipa cha·ani ringanirangko on·na man·na gita ia training program-o cha·ani tariani aro song·a chananirangko skie on·enga aro ia training program-o skie ra·anichi dingtang dingtang homestay, restaurant aro fast-food-rango kam ka·enggipa manderang gipin biaprangoni re·baenggipa manderangna namgipa cha·anirangko on·anichi nambate sokachakna man·gen.
Song·a chananirangko namdapatanichi ian gipin biaprangoni re·baenggipa manderangnasan ong·aigija joltangni manderangnaba namgni ong·gen.
