A·dokona re·baenggipa tourist-rang komianganichi neng·nikaniko man·na a·bachenga

SHILLONG: Adita salrangna skang, Assam a·dokoni re·baenggipa tourist taxi-rangko Hynniewtrep National Youth Federation (HNYF)-ni membor-rang, Umtyngar-o champengsoe watatpilani ja·man a·dokni dingtang dingtang biaprangona aro mongsongbate Sohra aro uandakgipa biaprangona gipin biaprangoni re·baenggipa manderang komiengahani a·sel da·o ia biaprango hotel, homestay aro uandakgipa dingtang dingtang bading chiwalanirangko dake cha·enggipa manderang neng·nikanirangko chagrongna nangtokskaengaha.
Iani bidingo Meghalaya Rural Tourism Forum (MRTF) aro Tourism Operators Association of Meghalaya (TOAM), Bristibar salo tom·e chanchirimangenba, gipin biaprangoni re·baenggipa manderang maming neng·nikanirangko chagrongna nangjana gita chel·chakanirangko on·china aro nanga gita ja·kurangko de·china, a·dokni Chief Minister Conrad K Sangma aro a·dokni Tourism Minister Paul Lyngdoh-ko didiataha.
Sohra aro uandake manderangni rona namnikgipa biaprango songdongenggipa bang·bata manderangan gipin biaprangoni re·baenggipa manderangko sokachakanio, cha·ani ringanirangko pala sim·anio aro tourist-rangko re·dilanio pangchakgiparangsa ong·ani gimin tourism-o pangchakgiparang ong·a indiba batanggimin salrangonin gipin biaprangoni re·baenggipa manderangoniko dingtang dingtang dolrang, nanga lekkarangko am·sandiengani gimin aro mitamrangkode a·dokni cholgugarangon champengsoengani gimin da·o Sohra aro uandakgipa biaprangona rona re·bagipa manderangko bang·e nikna man·jaengahachim.
MRTF aro TOAM-ko dilenggipa manderangni parakatani gitade, re·anggipa July-ni 26 tariko ong·gipa a·selni ja·man hotel-rango aro homestay-rango dongna book ka·ani 30 percent-ni gita komiangaha aro iani a·sel bading chiwale cha·enggiparang aro dingtang dingtang dokkanrangko dake cha·enggipa manderang noksan ong·na nangtokengahachim.
Indake ong·engon, gipin biaprangoni Meghalaya a·dokona re·baenggipa manderangna chel·chakanirangko on·na man·na gita Umtyngar-o police outpost-ko donchina, Shillong airport-oni dal·dalgipa songjinmarangona dal·kalgipa sildorengrangko bilruraatchina aro Shillong airport-oni Shillong songjinmaona aro Sohra-ona shuttle bus service-ko a·bachengatchina gitaba MRTF aro TOAM dolrang, a·dok sorkariko didiataha.