TURA: Agia-Medhipara-Phulbari-Tura (AMPT) ramani Konachar song sambao donggipa RCC Bridge No. 72/2 nosto ong·angengahani gimin ia dolong gita dal·dalgipa garirangni re·ruraaniko champengatchengaha ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, ia RCC dolongo be·srianirangko nikna man·engahani gimin manderangni naljokgnina ia dolong gita dal·dalgipa garirangni re·ruraaniko champengatchengaha aro Phulbari-oni Singimari, Mankachar aro Mahendraganj-chipakna re·angenggipa pilak dal·dalgipa garirang, Rajabala-oni Selsella rama gita re·angskana nanggnok.
Garobadha-oni Singimari, Phulbari, Tikrikilla aro uandakgipa biaprangona re·angskaenggipa pilak dal·dalgipa garirang, AMPT-GSB junction (Benabazar junction)-oni Selsella-Rajabala rama gita re·angskana nanggen ineba Deputy Commissioner u·iataha.
Indake ong·genchimoba, ambulance, fire service, petrol/diesel/LPG salgipa garirang, je garirangni jreanian metric ton 9-ona ong·achim, uandakgipa garirangkode ia dolong gita re·na on·kugen ine Deputy Commissioner parakatskaaha.
Garirang, jerangan metric ton 5-ona jreachim, uandakgipa garirangkode ia dolong gita re·na on·aigen ineba Deputy Commissioner u·iataha.
Nok rikani ba rama tariani bosturangko salgipa garirangkoba ia dolong gita re·na on·gen ineba Deputy Commissioner parakataha.