SHILLONG: MCS (Prelims) aro Meghalaya Police Service (MPS) porikkarangni result-rangko jegalenba Bristibar salo, Khasi Students Union (KSU)-ni membor-rang, MPSC office-ni mikkango jingjengatanirangko dakangaha.
MPSC-ni result-rangko namdapatchina gita KSU-ni somoi on·gipa konta 48 matchotani ja·man KSU-ni membor-rang, MPSC-ni talate segipa lekkarangko chite galaha aro ia lekkarangko so·e jingjengatanirangko dakangaha.
Jingjengatengmiting somoio KSU-ni dilgiparang, magistrate Sylvester Phanbuh baksaba adita jegrikanirang ong·angaha.
Magistrate-ni sing·anirangna aganchakaniko on·angengon, uamang mingdok badi ka·anirangko MPSC-na on·ahachim aro ia badi ka·anirangko MPSC namatna gita maming ja·kurangko de·jaha ine KSU-ni assistant general secretary Reuben A Najiar aganaha.
So·sojengjeng ong·atani kamrangko ka·na sikgenchimode uamang iandake tom·tome jingjengatanirangko dakjawachim ineba KSU-ni dilgipa, magistrate-na talataniko on·angaha.
MPSC-ni chairman PR Marwein-ko grongani ja·man kobor ra·timgipa manderang baksa agangrikengon, advertisement-o segualanirangko taridapna gita MPSC-ni chairman ku·rachakaniko on·ataha ine Najiar parakataha.
Najiar-ni aganani gitade, personal interview-na okama man·gipa candidate-rangni mark-rangko Bristibar attamon uamang tape dongen ineba MPSC-ni chairman, uamangna ku·rachakaniko on·ataha.
MCS (Prelims)-o skang pass ka·gipa candidate-rangni aro ja·mano seoktaia man·gipa sak 65 candidate-rangni mark-rangko jinmana mesokchina gita KSU dabiahachim ineba Najiar parakataha.