TURA: Adita salrangna skang, Paris-o ong·atenggipa Olympics-ko do·ga oanio, Jisu Kristoni bon·kamgipa mi attamko dakmesokanichi Kristianrangko onia ka·ani gita ong·ahani gimin Meghalaya a·dokni Chief Minister Conrad K Sangma-ni jegalataniara, politics-ni gita ‘kal·anisan’ ong·aia aro Gambegre by-election-na skang manderangna ‘dakmikanisan’ ong·aia ine Tura-ni gitcham MLA John Leslee K Sangma matnangataha.
“Toromni kamrangko mande ra·grikna nanga ine Chief Minister aganaha indiba ua an·tangan an·tangni aganani gita dakmesokgipa ong·chengna nanga. 2023 bilsini February jao, NPP Williamnagar-ni general secretary Georgeman Marak baksana gipin me·chik sakgittam aro me·asa sakgni, Kristianrangni rongtalgipa gitko ‘NPP’-ni bimingo ring·e Kristianrangko gisik saataha indiba ua somoiode Chief Minister aro NPP-ni national president, ia manderangni kosako maming jegalanirangko dakjaha aro Kristianrango kemaba bi·jaha,” ine Tura-ni gitcham MLA parakataha.
2023 bilsini Assembly election-ni somoio, NPP-ni dilgipa baksana gipin manderang, ‘I have decided to follow Jesus’ ingipa gitko ‘NPP’-ni bimingo ring·enba video tariahachim ine nikna man·a.
Iani bidingo NPP-ni dilgiparangko matnangatengon, “Iandake Kristianrangko chonnikahani gimin anga ong·gija dake git ring·gipa manderangni kosako case ka·ahachim indiba ia manderangni kosako NPP-ni gita ba sorkarini gita ja·ku de·anirangko anga knasona man·chipjaha. Iani bidingo NPP aro Conrad Sangma-ni kema bi·anirangkoba anga knasona man·jaha,” ine John Leslee parakataha.
Tura-o wine store-rangko kulirorona on·enga aro Robibar salrango sorkarini program-rangko ong·atenga ineba Tura-ni gitcham MLA, a·dokni Chief Minister aro NPP-ni national president-ko matnangataha.
