TURA: Mijal Sukrobar pringni bako, truck gari bolsa, autorickshaw bolsako Jengjal jolo salchepe a·sel ong·aha aro ia a·sel ong·anio autorickshaw-o gadoe re·angenggipa mande sakgittam sina gita nangaha.
Truck garichi salchepa man·e sina nanggipa manderangara, Jengjal Watregre-ni bilsi 38 ong·gipa Sili T Sangma, bilsi 41 ong·gipa Kenolish D Sangma aro bilsi 37 ong·gipa Moham D Sangma ong·achim ine ma·sina man·aha.
Koborko on·ani gitade, ia autorickshaw-ko salchepgipa truck gariara, Nagaland a·dokni registration nombor donggipa gari ong·achim aro ia truck gari ong·gija side gita ta·rakbee re·baenba, ia autorickshaw-ko salchepeaha.
A·sel ong·ani ja·man, ia truck garini driver, ua biaponi kataha indiba police-rang uko rim·na sandienga ine kobor on·aha.
Jengjal-ara Dadenggre Assembly constituency-ni ning·o ga·akgipa biap ong·a aro ia a·sel ong·anina Dadenggre MLA Rupa Marak-ba an·tangni suk ong·gijaniko parakataha.
Ia a·sel ong·anichi mande sakgittam an·tangtangni gamchatbegipa janggirangko gimaatna nangaha ine an·tangni suk ong·gijaniko parakatengon, dos dakgipa driver-ko ta·raken rim·china aro niamo pangchake sastiko on·china Dadenggre MLA didiataha.
Batanggimin sal somoirangonin Garo Hills-ni dingtang dingtang biaprango, ma·manti bosturangko aro ro·ongrangko salgipa truck garirangni skatang salanichi bang·en a·sel ong·anirangko nikna man·engachim aro ia a·sel ong·anirangchi bang·a janggirangan gimana aro mitamrang an·tangtangni ja·a jakrangko gimaatna nangtokengachim ine nikna man·a.
