TURA: Rongjeng Reserve Forest Range-o kamko ka·enggipa official-rang, a·dokni namgnina kamko ka·ani pal an·tangtangni man·gninasa chanchie kamko ka·skaenga ine Rongjeng jolni dingtang dingtang NGO-rang, jekai GSU, GSMC, NGCO, AOSW, ASWA, APA, FKJGP aro uandakgipa dolrang matnangatenba, ia official-rangni kosako ja·ku de·china aro ia official-rangko kamoniko ra·galchina a·dok sorkariko didiataha.
Iani bidingo Rongjeng-ni NGO-rang, Bristibar salo, a·dokni Chief Minister aro Additional PCCF-ni Secretary-ko grongenba, ia official-rangni kosako ja·kurangko de·china didiangaha ine NGO-rang parakataha.
“Rongjeng jolo a·dokni damsa Reserve Forest donge ian mikkim rasong ong·paengachim indiba ia Range-o kamko ka·enggipa official-rang, auction ka·e ra·gipa manderang baksa ku·mong aro chubatgipa official-rangna mamingkoba u·iatgija sriksrik ia Rongjeng Forest Reserve-ni bolko ratenba, auction-ko ra·gipa mandeni saw mill-ona maming permit gri salange on·aha,” ine Rongjeng NGO-rang parakatenba, uni giminsa ia Reserve Forest-oniko skatang bolangko ratramramako nike songni manderang, nangrimgimin NGO-rangna kobor on·ataha ine talataniko on·angaha.
“Kobor man·soa bakan chinga nangrimgimin NGO-rang, iani bidingo inquiry dakchina DFO-na ta·raken badi ka·eaha aro badia biaponiko bolrangko rate ra·angahachim, ua biapona NGO-rang baksa inquiry-na re·bae nion, uamangni niam gri bol rate ra·anggimin ja·pangrangko nikenba jagokmanpilaha,” ine Rongjeng-ni NGO-rang parakataha.
Indake ong·engon, Rongjeng Govt ME School sepango public hearing-rangko dakchenggija bonded warehouse-ko kulina gita licence-ko on·ahani giminba NGO-rang raken jegalataha aro iani bidingo ta·raken ja·kurangko de·china aro ia bonded warehouse-ko gipin biapona apjitatchina gita Chief Minister-ko didiatjolaha.
