TURA: Re·anggipa June jao, South Garo Hills a·jani Jadigittim songo, bilsi 36 ong·gipa me·chik saksako so·otanina South Garo Hills a·jani police-rang, mande sakgittamko rim·na man·aha.
Ia me·chikara Assam Kamrup a·jani Boko-o donggipa saksa Rajesh Bahadur minggipa mandeni bilsi 36 ong·gipa demechik Rupa Rabha ong·achim aro uni manggisiko June jani 30 tariko, songni manderang nikenba ja·mano police-rangna kobor on·atahachim.
Ia manggisiko name nion, uni gitoko ragekani chinkoba police-rang nikaha aro ia me·chikko saobasa drae til·ekani ja·man so·ote galaha ine police-rang parakatahachim.
Ia me·chikni manggisiko man·ani ja·man, ia a·selni bidingo sandirokna gita police-rang, Special Investigating Team (SIT)-ko songaha aro ia a·selni bidingo sandirokna a·bachengataha.
Ia a·selni bidingo sandirokon, ia me·chikko so·otanio jak donggipa mande sakgittamko SIT ma·sina man·aha aro uandaken ja·mano ia mande sakgittamkon police-rang rim·na man·aha.
Rim·ako man·gipa mande sakgittamara, Assam Goalpara a·jao donggipa Kacharipara songni David R Marak, North Garo Hills a·jao donggipa Tatolgre songni Demen R Marak aro apsan songni Salnara R Marak ong·a ine police-rang u·iataha.
Police-rangni u·iatani gitade, David R Marak-ko Kacharipara songoniko, Demen R Marak-ko Dengnanggre songoniko aro Salnara R Marak-ko Nongchram songoniko rim·na man·aha.
“Ia manderangoniko police-rang chongipa pistol ge·gni, atte pongsa aro churi ge·sako man·aha aro ia bosturangkon ia manderang, me·chikko so·otanio jakkalaha. Ia manderangni gimin sandirokangkuon uamang, an·tangtangni ra·bitenggipa silchidarerangchi Garo Hills-ni dingtang dingtang biaprango tangka dabie ra·na miksongengachim ine ma·sina man·aha,” ine South Garo Hills a·jani Superintendent of Police (SP) Shailendra Bamaniya parakataha.
