SHILLONG: Meghalaya a·dokni SSA skulrango Non-Teaching staff ong·e kam ka·enggiparangna 80 percent-chi dormaha bariatchina dabianiko sorkari chu·sokatna ku·rachakjaskal jingjengataniko dontongjawa ine All Meghalaya SSA Non-Teaching Staffs Association (AMSSANTSA) parakataha.
SSA skulrango non-teaching staff ong·e kam ka·enggiparangna dormaharangko bariatna gita a·dok sorkari, Commissioner & Secretary Vijay Kumar Mantri-ni dilanichi sak 20 membor donggipa committee-ko songe on·ahachim ine nikna man·a.
SSA skulrango non-teaching staff ong·e kam ka·enggiparang, an·tangtangni dormahako 80 percent-chi bariatchina dabitokengoba, kam ka·enggiparangna 25 percent-chi dormahako bariatna sorkari tik ka·ahani gimin AMSSAANTSA-ni membor-rang, re·anggipa Budbar salonin ari gri, Shillong songjinmani Madan Malki kal·chakramo jingjengatengachim.
“Chingni dabiani gita 80 percent-chi chingni dormaharangko bariatna ku·rachakaniko on·kujaskal chinga ia biaponi re·jitjawa aro chingni jingjengataniko dontongjawa,” ine Sonibar salo, AMSSAANTSA-ni dilgiparang parakataha.
Ia Non-Teaching Staff-o SSA-ni office ning·o cluster level, block level, district level aro state level-o kam ka·enggiparangkoba man·chapachim.
Ia jingjengataniko ong·atani bidingo kobor ra·timgiparangna talate on·angengon, “Chinga apsan kamna apsan dormahako dabienga. Chinga chingni dormaharangko bariatan baksana kamo brebatgiparangna 2 percent-chi dormahako bariatchina aro bilsiprakon 5 percent ka·e dormahako bariatchina dabie jingjengatenga,” ine AMSSANTSA-ni president Jennifer Synrem parakataha.
“2016 bilsionin SSA skulrango Non-Teaching staff ong·e kam ka·enggipa manderangni dormahako bariatchina dabiengoba da·alonan chingna maming ku·rachakaniko on·kujaengani gimin, chingni dormahako bariatna ku·rachakaniko on·kujaskal chinga da·aloni a·bachenge, ari gri asonge jingjengatna tik ka·aha,” ineba AMSSAANTSA-ni president aganaha.
AMSSAANTSA-ni parakatani gitade, SSA Non-Teaching staff-ni dormahako bariatna gita proposal-o nangchakegipa file-ko finance department-na watatmanaha ine Education Minister Rakkam Sangma an·tangan, 2023 bilsini Assembly session-o parakahachim indiba da·alonan iani bidingo maming ja·kurangko de·kujaengachim.