SHILLONG: Meghalaya Pradesh Congress Committee (MPCC)-ni president Vincent H Pala-ni kamo kusi ong·tokjaengani gimin mitam dilgiparang, uko ra·gale sakgipinko songskana miksongenga ine jangbingbanganirangko knasona man·aha.
Ia kattarangara baditana kingking kakket ong·a da·o dipet name ma·sina man·kujaengoba, MPCC president-ni NPP-ni dilgiparang baksa melianina Congress dolni mitam dilgiparang suk ong·tokjaenga ine kobor on·aha.
Mitam dilgiparangni u·iatani gitade, MPCC-ni president Vincent H Pala aro NPP-ni national president Conrad K Sangma-ni gisepo meli nangrimaniko da·o Congress dolni pilak dilgiparangan ma·sitokaha.
Re·anggipa April jao ong·atanggipa Lok Sabha election-o Shillong parliamentary constituency-oni amako man·ani ja·mansa Pala-ni NPP baksa nangrimaniko ma·sina man·bataha ineba Congress dolni mitam dilgiparang aganaha.
Ia dilgiparangni a·kangatani gitade, MPCC-ni president da·o doltangni kamrangon bang·e gisik nangjaengahachim.
MPCC-ni president Vincent Pala, an·tangni bading chiwalanirangnasa gisik on·batengahani gimin bang·bata changon ua Delhi-osa ong·batenga ineba Congress dolni mitam dilgiparang aganaha.
“District Council election-o aro 2028 bilsini Assembly election-oba NPP baksa susanagipa dolde Congress dolmangmangsan ong·aia,” ine ia dilgiparang aganaha.
Songadam nokadamrango manderangko salna gita Meghalaya a·doko Congress dolko bilakatpiltaina nangengaha ineba uamang aganaha.
Ia dilgiparangni a·kangatani gitade, MPCC-ni president, Khasi-Jaintia aro Garo Hills jolrangoba Congress dolko rikpiltaina maming kamrangkon ka·jaengahachim.
Pala-ni bilsi gittamna MPCC-ni president ong·ani da·o re·baenggipa September jaon bon·engahachim ine nikna man·a.
2021 bilsini September jao ua, Nongpoh-ni gitcham MLA Dr Celestine Lyngdoh-ni pal, MPCC-ni president ong·e jako ra·chengahachim.
Gambegre constituency-ni gitcham MLA Saleng A Sangma-ni Tura MP-na seokako man·e kamtangko watangani ja·man da·o Assembly-o Congress-ni MLA sakbrisan dongaiahachim.
