Sorkari baksa agangrikani bidingo HNLC-oni maming katta dongkujaenga

SHILLONG: Tom·tomanina agangrikaniko a·bachengpiltaina gita a·dok sorkari changni chang u·iatahaoba da·onan Hynniewtrep National Liberation Council (HNLC) bobil doloni iana aganchakanirang dongkujaengani gimin ian a·dokna jajrengna nangani ong·enga.
Re·anggipa bilsio HNLC bobil dol baksa a·dok aro ma·mong sorkarirangni agangrikaniko a·bachengatahaoba baditaba chang tom·ani ja·man HNLC bobil dolni dilgiparang, ia agangrikaniko ra·pilahachim.
HNLC-ni mongsonggipa dabianirangko sorkari knachakna gisik nangjaenga ine matnangenba, HNLC-ni dilgiparang, sorkari baksa agangrikaniko ra·pilahachim.
Sorkari baksa agangrikaniko ra·pilna gita re·anggipa bilsini December 31 tariko, HNLC-ni chairman aro commander-in-chief Boby Marwein baksana HNLC-ni general secretary Sainkupar Nongtraw, Home Affairs Ministry-na seachi u·iataha.
Uni ja·man, dolgittamni gisepo agangrikaniko a·bachengpiltaina gita a·dok sorkari baditaba chang HNLC-ni dilgiparangna u·iataniko on·atahachim indiba HNLC-ni dilgiparang, iani bidingo maming aganchakanirangko on·skakujaenga.
HNLC bobil dolni case-rangko kema ka·china dabianirangko sorkari nipilengkua aro iani bidingode Home Affairs Ministry-sa nanga gita ja·kurangko de·gen ine adita salrangna skangsan a·dokni Chief Minister Conrad K Sangma parakatahachim.
“Chinga iani bidingo ma·mong sorkari baksaba agangrikenga aro niamrangni bidingo chinga HNLC-ni dilgiparangnaba u·iatmanaha. India sorkari bak dongpagipa agangrikanirangode an·ching niamrangko ja·rikna nangaon ga·akaia aro HNLC baksa agangrikanioba chinga apsan niamrangkon ja·rikenga. HNLC-ni dabiani gita chinga chonchongipa dosrangkode kema ka·enga indiba gimikkode kema ka·gopna man·jawa,” ine Sangma aganahachim.
HNLC-ni dabianirangko agangrikna kusi ong·aigen ine ma·mong aro a·dok sorkariba HNLC-na u·iatmanahachim ine janapatskaengon, ma·mong aro a·dok sorkari baksa agangrikanio, HNLC-ni case-rang gimikon kema watgopgen ine agananide niamko pe·ani gita ong·skagen ine Chief Minister parakataha.
HNLC-ni case-rangko kema ka·na gita sorkarini chinko mesokahani gimin uamang sorkari baksa agangrikani bidingo chanchipiltaigen ine uni ja·man HNLC-ni ku·baltimgipa Sadon Blah parakatskaahachim indiba untalan HNLC doloni maming u·iattaianirang dongskakujaenga.