TURA: Rajabala-Balachanda-Selsella-
Ia ramao donggipa dolong ge·sa be·na siengahani gimin Bhutan-oni Bangladesh a·songona ro·ong salruraenggipa garirangko champengatani ja·man ia ge·etaniko Deputy Commissioner on·angtaiaha.
Rajabala-Selsella-Garobadha ramani obosta namsrangjaengahani a·sel, ia rama gita re·ruraenggipa gari gorarang namen neng·nikanirangko chagrongna nangtokengachim aro ia rama gita dal·dalgipa truck garirang, mongsongbate Bhutan-oni Bangladesh-ona ro·ong salenggipa truck garirang re·ruraengani a·sel ramani obostako namjabatatengachim.
Indake ong·engon, adita salrangna skang on·gimin ge·etaniko ra·pilenba, da·o Rajabala-Selsella-Garobadha rama gita pilak dal·dalgipa garirangni re·ruraanikon champengna gita Deputy Commissioner, ge·etaniko on·atskaaha.
AMPT ramani Konachar song sambao nosto ong·angenggipa dolong gita metric ton (MT) 12-na jreani komigipa garirangkosan re·na on·aignok ineba Deputy Commissioner u·iataha. MT 12-na bate jregipa garirangde ia dolong sokna skang, bosturangko galonenba, ja·mano dolong batangesa bosturangko gate re·angtaina man·gen ineba Deputy Commissioner-ni on·gipa ge·etanio parakataha.
West Garo Hills a·jao Selsella-oni Balachanda-ona dakanggipa rama namroroangjaengahani gimin ia rama gita Bhutan a·songoni Bangladesh a·songona ro·ong salgipa garirangko watjachina adita salrangna skangsan, Selsella aro Balachanda-ni FKJGP, ASWA, GSU aro GSMC dolrang, West Garo Hills a·jani Deputy Commissioner-ko didiatahachim.
NGO-rangni parakatani gitade, Selsella-oni Balachanda-ona dakanggipa rama nosto ong·roroangengahani gimin ia ramako taripile on·china changni chang sorkariko mol·molatahachim indiba da·alonan maming ja·kurangko de·chipkujaengachim.
“Ia rama namroroangjaengahani a·sel songni manderang aro ramako re·ruraenggiparang neng·nikanirangko chagrongna nangtokengahani gimin ia rama gita ro·ong salgipa garirangko watjachina chinga mol·molenga,” ine West Garo Hills-ni DC-na sedoatgipa chittio Selsella aro Balachanda-ni NGO-rang parakataha.
