SHILLONG: Bangladesh-ni skotong songjinmao donggipa Indira Gandhi Cultural Centre-ko wa·al so·e nisiaha aro cultural centre-ni cholgugao U Tirot Sing-ni mangkrongko songgipakoba nosto ka·e galaha, jekon ru·utgija somoirangna skangsa oprake on·ahachim.
Agency report-rango parakani gitade, ding·chaoe dongenggipa mande jinma, Bangladesh-ni skotong songjinmani Dhanmondi jolo donggipa Indira Gandhi Cultural Centre (IGCC) aro Bangabandhu Memorial Museum-ko Sombar salo chadrape nosto ka·aha.
Ia museum-ara, Hasina-ni pagipa Sheikh Mujibur Rahman-ni bimingo ku·pakgimin ong·achim, jekon skang 1975 bilsio president ong·e dangdike on·mitingo so·otahachim.
Re·anggipa February jao, Bangladesh-o Azadi Ka Amrit Mohotsav-ko maniani bak gita dake U Tirot Sing Memorial-ko Bangladesh-ni Dhakao donggipa Indira Gandhi Cultural Centre (IGCC)-o songahachim.
U Tirot Sing Syiem, jean saksa Khasi Matgrik ong·achim.
Nosto ka·e galanina matnangatan baksa, indakgipa matgrikrangni memorial-ko nosto ka·e galaniara jatko aro a·songko chonnika ga·aka ine State BJP matnange aganaha.
Da·roro seng·ani chasongo, Bangladesh-o, Matgrikrangni memorial-rangko pe·e galanina pilak jagokman·pilgen aro a·gilsakni je biapoba ra·chakna man·jawa. Uamangona kakketko chanchiani aro tom·tomani bakbak sokbachina” ine BJP Chief Spokesperson, Mariahom Kharkrang aganaha.
Indake Bangladesh-o memorial-rangko chel·chakani aro chonchongipa jatrangko chel·chakani bidingo nirokatchina gita party, Ma·mong Sorkariko didigen ineba ua aganaha.
B’desh-o, Indira Gandhi Cultural Centre aro U Tirot Sing-ni mangkrongko nosto ka·a
Date:
Share post:
